ولا ننسى اخواننا من الدعاء بان يرحمهم الله ويتغمدهم برحمته وينصرهم وياويهم اليه انه ولى ذلك و القادر عليه .
اليوم اصدقائى احب اقدم لكم شعر للعم صلاح جاهين وهو شعر مش كل البشر فرحانين .
والان مع الشعر ويارب يعجبكم
مش كل البشر فرحانين
ساعات اقوم الصبح قلبى حزين
اطل بره الباب ياخدنى الحنين
اللى لقيته ضاع
واللى اشتريته اتباع
واللى قابلته راح و فات الانين
و ارجع و اقول
لسه الطيور بتغن
و النحلايات بتطن
و الطفل ضحكه يرن
مع ان مش كل البشر فرحانين
حبيبى سكر مر طعم الهوى
فرق ما بينا البين ما عدناش سوا
حرام عليك يا عذاب
نبقى كده اغراب
ده البعد و الله جرح من غير دوا
ادى اللى كان و ادى القدر و ادى المصير
نودع الماضى وحلمه الكبير
نودع الافراح نودع الاشباح
راح اللى راح ما عدش فاضل كتير
ايه العمل فى الوقت ده يا صديق
غير اننا عند افتراق الطريق
نبص اقدامنا على شمس احلامنا
نلقاها بتشق السحاب العميق
وارجع واقول
لسه الطيور بتغن
و النحلايات بتطن
والطفل ضحكه يرن
مع ان مش كل البشر فرحانين
تعليقات
إرسال تعليق