الانفعال (من سلسلة كن ايجابى 7 )

 اجمل متابعين لنا فى كل مكان 

اليوم احب اتكلم معكم 

فى موضوع جديد من سلسلة كن ايجابى 

                             

 

الانفعال

احنا بنضايق احيانا من اشياء واشخاص مش بنقدر نسيطر على سلوكهم او ظروف مش بادينا نغيرها ونقول اصل الحاجة او الشخص عصبنا وبنخسر كتير فى عصبيتنا دى وكل واحد وحسب اللى متربى عليه بيخرج منه وقت عصبيته وانفعاله

فيه شخص بيخرج منه سلوك والفاظ غلط كتير وواحد تانى مهما اتعصب بيمسك نفسه ومش بيغلط فى حد لا بالفاظ او سلوك

الموضوع له شقين

                            ******************

الاول ان مافيش حاجة من سلوك حايظهر عليك الا اذا كان موجود فيه من الاساس . وعلى راى المقولة كل اناء ينضح بما فيه . يعنى مافيش حد من جواه اصلا مايعرف يهين بالفاظ سيئة وحايتعلمها وقت انفعاله لا

هو اتعود يسمعها ويرددها وبيلاقيها عادى بالنسبة له وعلشان كده وقت انفعاله بتخرج منه والعكس صحيح

                         *****************

وكمان انك لازم ماتخليش حد او اى ظروف تتحكم فيك

او تخليها تسوقك للمكان اللى انت مش عايز تروحه بالظبط زى الراكب فى سفينة وسايب قيادتها وفارد الاشرعة وزى ما البحر يرسله يابر امان او صخر يتحطم عليه

انت الوحيد اللى بتدير حياتك . حياتك هى السفينة واوعى تسيب القيادة للشراع والريح . وكمان اذا انت بتشوف ان الانسان ده مثلا (شخص معين ) افعاله بتضايقك وتنفعل بسببه غير نظرتك لافعاله ووقتها حاتتغير تصرفاتك

يعنى ركز مع نفسك اكتر وحاول تغير وجهة نظرك للى بيحصل معاك

مثال ( شخص دايما بيحب يسخر منك ويضايقك , اذا شفت الموضوع من نظرة انك عندك نقص فعلا فى الشئ   ده فحاتعمل عقدة لنفسك انما لما تشوف نفسك كامل الكمال للله وحده طبعا اللى اقصده من الكمال هنا انك تتقبل نفسك وتعرف ان زى ما عندك نقط ضعف فيك من القوة الكتير اوى وهنا مش حاتشوف ان عندك نقص ولا حايهمك اى حد مهما يقول ووقتها حايكون سخرية الشخص ده تفاهة منه بالنسبة ليك انسان فاضى وتافه لانه اذا كان قوى وعنده شئ بجد ما كنش فضى للسخرية من الناس واغلب دول بيكونوا هم بنفسهم عندهم عقدة نقص)

                              ************

طبعا لما تتقبل نفسك وتحبها بكل ما فيها وتحاول تتطورها هنا انت بتكون عندك من القوة والثقة بالنفس اللى يخليك تهد الجبال