من سلسلة كن ايجابى 6 (سامح نفسك )

 اجمل متابعين لينا عبر العالم 

يارب تكونوا بخير 

اليوم احب اتحدث معكم عن موضوع 

                             @@@@@                         

   ***مسامحة النفس ***

 

سامح نفسك واتصالح معاها

لكتير من الوقت بنكون ضد انفسنا ومش راضيين عنها

بتكون فيه حاجات وافعال مش قادرين نسامح نفسنا عليها , يمكن يكون عندنا حق واحنا ارتكبنا اخطاء فعلا سواء فى حق انفسنا او الغير ويمكن نكون متحاملين على انفسنا .

وبتفضل عقدة جوانا , بنرفض نفسنا ودايما بنشوف اننا اقل او لا نستحق , احيانا بنكره نفسنا كمان حتى لو لمجرد ان عندنا ضعف او خوف من حاجة .

                  @@@@@@@

والحل اننا لازم ندى نفسنا القيمة والقدر اللى احنا بجد نستحقه , حاول تتصالح مع نفسك اعتبرها صديق قديم كان معاك فى كل شئ فى فرحك وحزنك وديما معاك وعمره ما اتخلى ولا سابك فى يوم حتى وانت رافضه وبتجرحه ديما .

 

                      @@@@@@

 

كتير من زمن فات عن نفسى كنت بتخانق مع نفسى وكنت ضدها ديما اوقات كنت بظلمها واوقات هى كانت بتظلمنى , لحد ما فى يوم وحادثة خلتنى اتصالح معاها واتقف معاها اننا مش نكسر بعض .

(بعض الناس حايقولوا عليا مجنونة بس ده حقيقى وجود شخص جواك نفسك اما تكون داعمة ليك او تخاف حتى منها لما تعد لوحدك . وعلشان تكون داعمة ليك فيه خطوات انا مش حاقولكم عن كلام العلماء او المثبت لا انا حاعرض تجربتى مع نفسى زى ما ااتعودت انى اشارككم)

افتكر بس من كام سنة ووقت ما صديقتى اتوفت الله يرحمها اتفقت مع نفسى اننا نكون داعمين لبعض وانى مش حاجى عليها او اظلمها بل حاتقبلها زى ما هى

 

                    @@@@@@@

 

اقبل نفسك بضعفك وتعبك ووجعك والمك وفرحك وجنانك وحتى فى ابسط واصعب مراحلك , مش تقول لازم اكون واتصرف بالشكل ده ماينفعش انى ابكى فى الوقت ده او ابان ضعيف .

احنا بشر عامل نفسك على انك نفسك هى صديقك ويكفى انها معاك ومش سابتك ومشت اذا اعتبرناها انسان مستقل . نفسك هى الوحيدة اللى بتتالم او تفرح معاك

مهما كان جنبك شخص بيحبك مش حايقدر يحس ابدا باحساسك , صح حايدعمك بس انت اللى بتتالم

وعلشان ده اولى الناس باهتمامك هو انت ( نفسك )

اهتم بنفسك وصالحها واعمل كل حاجة انت بتحبها حاتلاقى نفسك بتدعمك وحاتوجد لنفسك سلام داخلى

صعب تعاند نفسك لانها ببساطة جزء منك , فيبقى المصالحة والتقبل هو الحل المنطقى والوحيد علشان وقتها حاتقدر تتغير وتتطور وتحقق كل اللى بتحلم بيه وبعدها حاتقدر تقدر وتعطى لنفسك القيمة اللى تستحقها