الضغط النفسى

مساء الخير على احلى متابعين متابعى مدونتى الكرام وفضلا منكم اتمنى تفرحونى وتكونوا اعضاء مستمرين ومش مجرد متابعين عابرين

وشكر خاص لكل المتابعين لان متابعتكم هى اللى بتخلينى استمر

انهاردة حانتكلم عن ركن جديد وهو تطوير الذات

انا تعبت كتير واستخدم كتب تطوير الذات والعديد من الفديوهات من سنة 2010 يعنى عشر سنين حاليا

احم احم ههههههههه انا بحب اطور نفسى جدا واستخدم واجرب الجديد اللى ممكن يساعدنى فى كل شئ حتى اكون احسن والركن ده حايكون مش مجرد مقالات بس حايكون من خبرتى الشخصية زى كل مقالاتى فى مدونتى زى ما عودتكم كل الكلام بيكون عن تجربة شخصية معايا او معايشة للتجربة مع ناس مقربة يعنى هى خبرات متناقلة واتمنى الافادة للجميع

المفروض المقال انهاردة يكون عنى انا وازاى بدات بكتب تطوير الذات وازاى فادنى ده كتير جدا بس ان شاء الله حايكون المقال الجاى ازاى بدات بتطوير الذات وايه الكتب اللى افضلها

انهاردة حانتكلم عن الضغط النفسى وانا اكتر حد ممكن اكلمكم عنه

لانى مش حاتكلم عنه من خلال دراسات او الامراض لا انا حاتكلم من خلال تجربتى اللى تعايشت معها

موضوعنا عن الضغط النفسى : _

انا عن نفسى تعايشت مع الضغط النفسى لانى انسانة عصبية كتير وزادت عصبيتى بعد التخرج والشغل ومشاكل البيت العادية وايضا المشكلات التى تعايشت معها ودى انا اتكلمت عليها كتير وكان اكبرها بالنسبة ليا وفاة اقرب صديقة لقلبى والتى تغيرت بعدها وتعب والدتى اللى كان بالنسبة ليا فترة الحمد لله انها عدت وبدات تشفى وتعود كما كانت . وعلى فكرة ده كله كان ورا بعضه يعنى احداث متتالية , وتعبت بعدها اكتر طبعا يعنى

انك تكون واقف فى وقت الكل ممكن ينهار وتعبان  ولازم انت تفضل صامد وتبث الامل . الموت اقوى شئ ممكن نعديه بس الاصعب انك تعيش وتتنفس تانى حتى مع الموت والوجع وماتنكسرش . الضغط النفسى حاجة صعبة جدا جدا وانا مريت بيه والفترة الاخيرة من حياتى تعبت منه كتير لدرجة ان اى صوت كان بيعصبنى وكتير جدا وماكنتش بعرف انام من كتر التوتر .

يعنى توتر وعصبية وطبعا القولون العصبى كان بيموتنى لدرجة انى جالى الضغط لحد لما حسيت انى وصلت للنهاية وكنت بقول لنفسى مش دى منار المتفائلة واللى ما كنش فيه اى حاجة بتاثر فيها ثقتها بربنا وبنفسها كانت فى السما  . واحلامى وكتبى وكل افكارى اللى كان نفسى احققها انهارت , اتحولت لانسانة تانية مزاجية وتعبانة دايما ومش عايزة اكلم حد وعصبية على اتفه سبب . ولما حسيت انى وصلت للنهاية قررت انى اترك كل شئ

الضغط النفسى وصلنى انى ما كنش باكل لقمة من غير برشام للقولون . تركت كل شئ وعلى فكرة انا كنت مانعة القهوة نهائيا قبل كام سنة  والشاى مرة او اتنين بس وبشرب ينسون وشاى اخضر مع كل العصبية دى والضغط العالى  تخيلوا جننت دكتورى يعنى ههههههههه المهم جربت الادوية وتعبت اكتر ولما لقيت نفسى بنهار قررت ان لا

الامراض اللى ممكن نتعرض ليها من الضغط النفسى كتييييير  :

اذا اتكلمت عليها فكتير  يعنى اكتئاب وضغط وسكر والتهاب مزمن ومشاكل فى القولون والجهاز الهضمى والمعدة وجهاز المناعة بيتاثر يعنى كل حاجة بتبوظ والقلب ما ننسهوش امراض الشرايين

كفاية اظن كلام انا الحمد لله لحقت نفسى قبل ما الموضوع يتطور

عملت ايه علشان اعالج نفسى :

وبقرر اعالج نفسى لانى قبل شوية قوت انى بطلت الادوية لانى عارفة ان ده كله بسبب العصبية والضغط النفسى اللى اتعرضتله الفترة اللى قبلها

طيب انا بطلت الادوية بس اول شئ فى علاج اى مرض او تغيير عادة انك تعترف لنفسك . تدرك ان الشئ ده فعلا بجد موجود فيك وده اول طريق للعلاج . وقتها انا ادركت انى لازم اتغير قرات فى كتب كتير وسمعت فيديوهات اكتر . سبت دوا القولون ومنعته وبقيت باكل على فترات وكمان دخلت الاعشاب الطبيعية فى اكلى ساعدتنى كتير على محاربة القولون

بطلت اتجادل مع اشخاص عارفة انهم مش حايتغيروا لان ده بسبب عصبية كبيرة

بطلت اشيل مسئولية كل حالة يعنى بطلت ابالغ برد فعلى تجاه كل حاجة

علشان اهدى نفسى لما اتعصب مهو الموضوع محتاج تدريب مش بتتغير بين يوم وليلة ربطت انى لما اتعصب اروح اعمل حاجة يعنى العب رياضة بس فيه وقت بيكون صعب  يعنى لو فى الشارع فبغمض عينى وافكر فى اى حاجة تانية واوقات بكتب او اصمم صورة اركز فى اى شئ المهم علشان اصرف انتباهى عن الغضب واحول طاقتى للحاجة الجديدة اللى بعملها

اتعلمت كمان لما اكون مضايقة من شخص اوى او موقف يعنى اروح فى اوضة لوحدى واغمض عينى واتخيل الشخص ده  انى قولتله كل حاجة انا عايزة اقولها وهوه سمعنى ونفذ كلامى او ان الموقف اللى مضايقنى اتحل وبعدها اتنفس بعمق وافتح عينى برتاح

اتنفس بعمق : لقيت نفسى انى معظم الوقت يمكن بنسى اتنفس , يمكن حد يستغرب ويقول اذا بطلتى تنفس تمونتى لا لان التنفس فعل غير ادراكى فبتتنفس بس بجزء من الرئة يعنى مش يتتنفس التنفس اللى انت محتاجه علشان الاكسجين يوصل للجسم كله وده اللى بقيت اركز عليه وفيه طريقة بيسموها تنفس الاسترخاء ممكن تبحثوا عنه

الحركة كل نص ساعة بتخلينى حتى لو متعصبة اغير الفعل اللى بعمله وده بيقلل العصبية

بقيت بفكر تجاه الامور البسيطة بقلة اهتمام او لا مبالاة وده للامور التافهة زى ما قولت يعنى مكالمة غلط او حد بيصرخ او فيلم فوته حد قال تعليق بايخ , طفل بيغلس للفت الانتباه , او مشاجرة جنبى ماليش دخل بيها او صلة .

والحمد لله بدا قولونى يرتاح تماما الضغط بقى طبيعى معظم الاوقات ولما يرتفع باخد اى اعشاب تنزله واتنفس بعمق ووقتها بينزل وحده بقيت اهدا كتير بنام صحيح لسه بحاول اظبط موعيد نومى والعصبية فى اوقات بتفلت منى اعصابى بس اهدا كتير من الاول والانسان بياخد وقت علشان يغير عاداته بس الاهم انك ماترجعش للعادات القديمة والا حاترجع حالتك سيئة زى الاول تانى

اتمنى انى اكون فدتكم ولو بجزء بسيط من خبرتى وفيه ناس حايقولوا ان فيه حاجات مكتوبة اناس كلها تعرفها حاقولها صح بس انا بتكلم عن تجرب يعنى انا كل اللى كتباه ده جربته ومش بس نقلاه عن سمع لناس تانية لا ده عن تجربة

اشفكم فى مال جديد

استنونى