من سلسلة ما علمتنى الحياة 6

  مساء الخير على احلى فانزى  وحشتونى كتير تعالوا انهاردة وميعاد مقالنا الاجتماعى  واليوم سنتحدث عن :

الطمع والاستغلال

الصفتين متلازمتين مع الاسف الانسان الطماع ديما بيكون مستغل للاخر ومش عايز غير مصلحته هوه وبس وده بيكون على حساب اى حد ويمكن اقرب الناس ليه الانسان ده ( الطماع ) يمكن تلاقى حواليه ناس بس فى الحقيقة بيكونوا مجبورين انهم يكونوا جنبه او مخدوعين فيه او مستفادين منه يعنى زيه طماعين وفى نفس الفريق

صفات الانسان الطماع

ممكن يبيع اى حاجة واى حد اذا وقفت فى طريق مصلحته ويدوس على اى حد بلا رحمة او شفقة . الطماع بلا قلب وبلا عقيدة حتى وان كان متدين ظاهريا فقلبه مليان بحب ذاته وطمعه فى غيره ووقتها مش بيشوف بالطبع اى خير او نعمه عنده , هو على الدوام شايف اللى عن غيره وعايزه وباى طريقة عايزة يحصل عليه .

نهاية طمعه

ماعتقدش ان الطماع ممكن يتغير الا من رحم ربى . اما نهاية طمعه بتكون بالموت او بالندم الشديد على فقد لا يستطيع تعويضه ووقتها بينتهى بيه الحال بمرض عضال او شئ كبير بيسنيه عن طمعه . يعنى فى النهاية سيان موت او فقد ومرض مش فارقه كتير .

تصنيف الطمع

تجربتى انا

يوووه كتير الصراحة قابلت ناس طماعين وحاولوا يستغلونى وكانت اكترها فى مراحل الدراسة ؛ حيث ان الطماعين والمستغلين دول كانوا فى تصنيف الاصحاب . ودول كان استغلالهم عاطفى , طمع العاطفة من اكتر الحاجات اللى بتسببلك ضرر ؛ وده لانه مستمر , الضرر النفسى اسوأ بكتير من المادى والتأم جروح الروح اصعب بكتير . وده انا اتالمت منه فترة من حياتى .

وقابلت منهم ناس فى الشغل ودول بيكون استغلالهم وطمعهم فى وقتك وراحتك وزيادة راتبهم على حسابك ؛ بمعنى يعطوك شغل اكثر وهم ياخدوا المكافأة عليه . بس دول ما كانوش بيعرفوا يستغلونى اوى او بمعنى ادق بمزاجى كنت بفوتها .

وفيه ناس الطمع المادى وده يمكن من اشهر انواع الاستغلال والطمع وده عايشته من ناس ليا كتير يمكن مش متذكرة اوى حادثة حصلت معايا , لكن حوادث كتير حدثت مع اقربيى وده فهمتنى ان الناس من الصنف ده شر بيكرهوا انك تكون فى خير وعايزينه هما وبس على الرغم اذا الناس دى كان نيتها خير كانوا اخدوا اكتر بكتير من اللى حايوصلوله بطمعهم .

ولكن فى النهاية الكل له نفس النهاية انه مش يكسب حاجة خسارة والم ووحدة ( هو الطماع بيحس : معلش سؤال منى )

اممممم مش عارف الصراحة بس ممكن افسر الخسارة : هى للشئ اللى كان سبب الطمع مش بيحصل على حاجة وكمان ان الشخص اللى بيستغله مهما طال الوقت بيفهم وبيخسره ومعاه الشئ المادى او المعنوى اللى كان بيحصل عليه .

والوحدة  : انه بيكون وحيد الا من الناس امثاله او المخدوعين فيه اللى فى يوم بيعرفوا الحقيقة ويرحلوا بردوا او المجبورين انهم يكونوا معاه ودول بيكونوا فى داخلهم كارهين له .

الالم : من منطق ان كل شئ الى زوال فهو بيتالم بردوا ففى النهاية هوه انسان , وحتى اذا كان الالم ده اتاخر فهو اكيد بياخده وبيعدى بيه زى اى انسان

معلش انهاردة يمكن مش حاقدر اصرح بالسبب وراء اخيارى للموضوع ده اليوم لان التجربة مش تخصنى ولكن الناس من امثال الطماعين بيأذوا اوى وحتى اقرب الناس ليهم فيارب ابعدنا عنهم وابعدهم عنا .

استنونى فى مقال جديد اه مقال الاسبوع الجاى ان شاء الله مهم كتير يخص بنات كتير وحايكون ان شاء الله عن خداع الشباب للبنات فى مسمى الحب الزائف واللعب بعواطفهم ومشاعرهم . 
مستنيه اراءكم