الصعوبات التى نواجهها فى الحياة 7

مساء الخير على احلى متابعين سواء للبيدج او المدونة اصدقائى الاعزاء وحشتونى بصراحة . قبل اى شئ احب اشكركم على دعمكم ليا , كل اصدقائى اللى ساعدونى يوما وعلى طول جنبى .

انهاردة وزى ما نزلت فى بوست على البيدج حايكون فيه مقالين اسبوعيا مقال خاص بالحضارة حانتكلم فيه عن العلماء والانجازات الحضارية فى مختلف الحضارات وفى حضارتنا الاسلامية بشكل خاص . ومقال اخر حانتكلم فيه عن مشكلاتنا وصعوبتنا وتعلمنا واليوم حايكون احدى موضوعاتنا الاجتماعية , وكمان حادرج قسم خاص فى المدونة ان شاء الله للكتب والفيديوهات والكورسات التعليمية .

 اه هاه اتكلمنا كتير فتعالوا ندخل فى الموضوع على طول موضوعنا اليوم عن  : 

           

القناعة

القناعة معناها اننا نرضى بما قسم الله لنا يعنى نرضى بالوضع اللى احنا فيه ومش نبص على غيرنا ليه صاحبتى عندنا فون احسن منى وماركة افضل او مثلا ليه انا مش حلوة زى فلانه . ده صاحبى اتخرج وباباه اتوسطه واشتغل وانا اعد فى البيت, صاحبتى اتجوزت وانا لسه . كل ده معناه عدم رضا مننا طيب يعنى مهو انا حظى لا يا جماعة قديما قالوا كل واحد واخد رزقه 24 قيراط وربنا سبحانه اسمه العدل بس الرزق مش بس فلوس او نجاح لا الرزق فى حاجات كتير اوى . حب الناس الذكاء العلم الفهم الافكار الزواج الابن الصالح والزوجة والزوج الصالح الاصحاب الجدعان فى حياتك حتى الدعوة المستجابة صحتك رزق وكل نعم ربنا علينا سبحانه رزق والرزق ليه اشكال كتييييييييير اذا اعدنا للصبح مش حانقدر نعدها . طيب فهمنا ان الرزق انواع بس بردوا حد حايقولى انا كان نفسى فى كذا ومش عندى . قبل ما نتمنى اللى فى ايد غيرنا فيه حاجتين مهمين اوى

الاولى

ان انت اخد رزقك كله واى حاجة ربنا كاتبهالك حاتاخدها حتى لو هربت منها حاتجيلك . تمام يعنى رزقك لا يمكن حد ياخده غيرك ابدا . وكمان انت اذا عندك مشاكل فغيرك اللى انت بتتمنى اللى عنده ده انت ماتعرفش ايه المشاكل اللى عنده فلما تتمنى حياته او رزقه حاتاخده كله يعنى عايز الفلوس اللى مع فلان حاتاخد الفلوس بس بكل المشاكل اللى معاها .  اى نعمة بتكون جانب منها نعمة وجانب نقمة . فلما ربنا يديهالك فى وقتها سبحانه عارف انك مستعد ليها .

الثانية

انا مش اقصد ابدا ان القناعة والرضا بوضعنا الحالى ابدا اننا نبطل يكون عندنا طموح واحلام واننا نسعى نكون احسن لا ثوانى بس لان الموضوع معقد شوية اننا نرضى يعنى انا بشتغل مثلا عند دكتور فراضى حاليا بوضعى علشان اتعلم واتدرب واكتسب الخبرة الكافية . سواء كدكتور متدرب او ازاى ادير عيادتى فيما بعد بس ما يمنعش انى افكر واحلم واحوش علشان يكون ليا عيادتى الخاصة او انى اعمل بزنس تانى علشان ازود دخلى . الاتنين مش بيتعارضوا لا اللى اقصده  الرضا بالظروف اللى انت فيها لانها مفيدة ليك بجد مهما كانت مؤلمة متعبة مجهدة او مش عجباك لازم تعدى بيها علشان ربنا عايزك تمر بيها علشان تتعلم حاجة حاتفيدك فى المرحلة الجاية لازم حاتفيدك والا ربنا سبحانه وتعالى مش حايرضى انك تعدى بيها . اى وضع انت فيه ومش عاجبك هوه ليك علشان اذا مش مريت بيه مش حاتعرف تتعامل فى اللى جاى وفيه قصة حصلت معايا

فى وقت وقبل وفاة صاحبتى الله يرحمها وتعب والدتى ربنا يكملها شفاها على خير يارب اعدت فترة من حياتى فى مكان بعيد كل البعد عن بيئة وثقافة المكان اللى انا مقيمة وعشت واتربيت فيه كان صعب بالنسبة ليا لان الناس غير الناس وحتى الامكانيات كانت اقل كتير فى وقتها من اللى انا متعودة عليه فى بيتى وكنت بقول فى نفسى ليه انا روحت هناك بالمناسبة انا رحت علشان اشتغل وكنت انا اللى مختاره ده سبت بيتى وعيلتى وكنت مقيمة مع ناس ارايبى فى البداية كنت تعبانه وكان بيتى هناك لسه بيجهز كنت مضايقة وبسال نفسى انا مش محتاجة الشغل ماديا فليه انا بعمل ده بس كنت دخلاها تحدى مع نفسى وكملت لحد ما نهيت مدة شغلى  وبعد ما  تعبت نفسيا نزلت رجعت بيتى مع عيلتى . ما كنتش فاهمة الصراحة لحد لما جت وفاة صاحبتى الله يرحمها وبعدها تعب والدتى اقولكم بصراحة لولا الوقت اللى انا قضيته هنالك ماكنتش حاقدر اتحمل , فهمت وقتها ان الوقت ده والظروف كان لازم امر بيها علشان تعلمنى ازاى اكون اقوى وازاى اقدر اواجه الظروف واكون لوحدى اتحمل المسئولية . كتير بفكر لولا الوقت ده اللى كنت مضايقة منه كنت حانهار اكيد وماكنتش حاقدر اكون معاكم انهاردة ولا بالقوة اللى انا فيها دى

وعلشان كده حارجع واقول لازم نرضى ويكون عندنا قناعة باللى فى ادينا وياريت نهتم شوية بالنعم اللى ربنا اديهالنا وقتها حانعرف نحافظ عليها قبل ما ينتهى وقتها , فاوعى تهتم طول الوقت باللى مش عندك وعايزه وتنسى تشوف اللى عندك وتهتم بيه . يعنى عندك اهلك اهتم بيهم قبل ما يرحلوا . صحتك اهتم بيها قبل ما تمشى . اصحابك قولهم انك بتحبهم  .عندك وقت اتعلم فيه

وماتنساش حلمك وطموحك اعمل اللى عليك وربنا شايفك واكيد حايتحقق كل اللى بتحلم بيه لما تكون مستعد ولما ربنا يعدك ويجهزك لده فاستحمل وارضى بكل اللى يجيلك لان ده جزء من تجهيزك لحلمك . واعرف ان لو انت مش عارف ايه حلمك حاليا اشتغل اتعلم اسعى وهوه حايظهر لوحده ادعى ربنا انا  وقوله يارب انا عايز كذا وكذا ...ديما خلى فى عقلك اللى بتحلم بيه انه مش مستحيل ووقتها حايظهرلك حلمك ادام عينك كل واحد فينا وليه دور فى الدنيا دى ما فيش حد اتخلق عبث حاشا لله .

نصيحتى انهاردة  ارضى باللى عندك واهتم بكل النعم اللى ربنا ادهالك , ولازم تعرف ان غيرك عنده مشاكل يمكن اكتر من اللى عندك مع النعم اللى عنده فقبل ما تبص على اللى فى ايده اعرف هوه بيعانى من مشاكل ايه الاول وقتها حاتشكر ربنا على اللى عندك . وده حايديك احساس بالسعادة لازم تبدأ بالامتنان والشكر على اللى عندك وتبدا تطلب من ربنا اللى بتتمناه اطلب كل اللى بتتمناه وعيش لمدة دقائق كل يوم فيه شوف نفسك وانت حققت اللى عايزه طموحاتك وكل اللى بتتمناه حاتحققه اكيد .

استنونى فى مقال جديد .