الصعوبات التى نواجهها فى الحياة 5

مساء الخير احلى متابعين انهاردة استعنت باصدقائى فى الاراء لاختيار موضوع مقالى واشكر صديقتى كثيرا لانها اثرتنى بالكثير من الافكار .

متابعينى الكرام اتكلمنا عن حاجات كتير بتقابلنا وانهاردة انا حاخد الموضوع ده من شقين , طيب بس الاول حانقول ايه هوه الموضوع فى الاساس . موضوعنا انهاردة عن

معاملة الاهل مع الابناء 1

وده حايكون ليه اكثر من جزء بصراحة ممكن اتنين او اكتر على حسب , ما يؤل بنا الحال المهم تعالوا بسرعة نبدأ

من البداية كان ليا راى شخصى وهوه اننا لازم نتعلم علشان ابناءنا ويمكن اتكلمت على السريع فى ده فى سلسلة تعليم الذات 5 ولكن انهاردة ولما جالى اكتر من راى مش بس من صديقتى لا وناس تانية كانوا بيتسالوا عن ده فكان لازم اتكلم فى الموضوع هو ليه اكتر من جانب زى ما قولت وانا حاتكلم عن الاخطاء وممكن نعالجها ازاى سواء الاخطاء من الابناء او الاهل

انا هابدأ بالاهل ومش تزعلوا منى

اولا : فى عمر الطفولة

ممكن دلعك الزايد انتى او الوالد الجدة او الجد يبوظ الطفل سواء من ان كل طلباته مجابه او عادى انه يضرب او يشتم حد , والبعض منكم بتفرحوا بده فى وقته وعلتكم فى ده انه لسه صغير طفل ومش فاهم حاجة لا حضرتك احب اصدمك ان الطفل بيكون فاهم كل حاجة وهو عنده اشهر قليلة بيكون قادر يفرق مين اذا عيط مش حايستحمل وينفذ له طلباته .

ثانيا  : الضرب

انا اولا ضد الضرب مش بحبه ومش بستعمله على فكرة انا بحب ادلع الاطفال جدا ومعروفه فى العيلة بده بس كمان مش بحب قلة الادب وكلمتى واحدة وحازمة جدا بس بعاقب بانى اخاصم او احرم من الحاجة اللى بيحبها بتجيب مفعول سريع وبتقوم السلوك بجد . الضرب للطفل فى اى مرحلة بيحسسه بالاهانة وبعد شوية بيتعود جسمه مهما كان الضرب شديد ووقتها بيقول اضرب وانا حاخد الضرب واعمل اللى انا عايزة . يعنى مش بيدى اى مفعول

 ثالثا  : الاحترام 

اه يانى حاليا بنسمع اطفال كتير بيقولوا لاهلهم باسمائهم مش ماما وبابا ولما بيكبر الطفل بيحصل عنده خلط وبيشتكى الاهل من عدم احترامه ليهم . طيب مهو من الاساس احنا مش عودنا ان فيه ادب وفيه احترام فيه ماما وبابا وليهم مكانتهم مش اصحابك هما تناديهم وتطاول عليهم فبلاش اه اصاحب اطفالى بس فى مرحلة تانية مش مرحلة الطفولة

وعلى فكرة دى من اخطر المراحل اللى لازم نأسس فيها اخلاق الاطفال . كتير من السلوك الخاطئ للشاب او البنت طبعا بيكون اساسه الطفولة يعنى حالة السرقة او الرد فى منتصف الكلام او عدم الاحترام للوالدين  او الرد والتطاول على الاهل اللسان السليط الكدب كل ده واكتر منشاه من الطفولة ونصيحتى للاهل لازم تكونوا على وعى واهتمام بالطفل بيحتاج مراقبة دائمة  , اهمالنا وتغافلنا عنهم بيخليهم يكتسبوا عادات سيئة كتير اوى فى الفترة دى وبيكون حجة لاستغلال ناس كتير لاطفالك . حرصى من كل اللى موجودين حواليكى اصحابك او جيرانك انتى ماتعرفيش ايه عندهم عادات سيئة ممكن يعلموها لاطفالك , الدادة مش شغلتها تربى انت كام واب التربية مسئوليتكم الاولى

وصلنا لرقم كام

 رابعا : الام العاملة

كان الله فى عونك بجد مع الحياة وغلاءها يمكن تضطرك الظروف للعمل , بس صدقينى الفلوس مش اهم من اطفالك مش حايكونوا مبسوطين بشوية العاب اكتر او لبس جديد وانتى مش موجودة جنبهم السنوات الاولى فى عمر الطفل مهمة جدا للام  . الطفل بيكون ارتباطه العاطفى بيها يا يبقى عنده انتماء او لا . ولما يكبر الطفل وتكبرى انتى مش تعيبى عليه انه يسافر او مش يسال عنك اصل انتماءه مش ليكى

نحن نحصد ما نزرع ولما اصلا احنا مازرعناش الحب والاهتمام ويادوب اصبح محصور فى فسح او حاجات مادية تاكدى انه حايترد بنفس الطريقة . مفاد الموضوع قضى وقت اطول معاهم اسمعيهم العبى معاهم احضنى ولادك حسسيهم انك موجودة نيميهم فى حضنك . وقوليلهم انك بتحبيهم وحاتفرق كتير صدقينى , وحاولى تقللى وقت شغلك علشان اطفالك السنين اللى بتعدى مش بترجع تانى

خامسا  : الخوف من الاب

كتير مننا لما اطفاله بيضايقوه الكلمة الشهيرة حاقول لباباك لما يجى وده طبعا علشان يخاف ويبطل الافعال المستفزة

بس الاب مش مادة للتهديد ده معنى الحنان والامان وده اللى لازم يعرفه الطفل  لازم يخاف من زعل الاب مش من الضرب او العقاب اللى حايعاقبه الاب

بنشتكى كتير من ولادنا بس فى الحقيقة بنربى غلط ونقول جيل زمان انا من راى ان الجيل اختلف صح بس كمان احنا اختلفنا مش عندنا الصبر او الحنيه الحنان والهدوء اللى كان عند اهالينا وده لان اهلنا ماكنش وراهم غيرنا لا تكنولوجيا ولا وسائل الاتصال الاجتماعى ولا يوتيوب ولا اكتر من الف قناة وكل ده بيلهينا عن اطفالنا مع العمل المعتاد شغل البيت والتنضيف ونفسك وزوجك واذا شغلك . شوفى ملهيات وقتك وانسفيها من حياتك وبدلها قضى الوقت مع اطفالك حبيهم مش كل اللى يسمعوه منك زعيق وضرب وصريخ

لازم نهدا ونعطى اطفالنا الثقة ونقومهم لاننا بنحبهم واياكى والمقارنة بتجيب نتيجة عكسية تماما . حسسيه انه افضل حد عندك وانه يقدر يكون احسن من اى حد بمجهوده وبادبه واخلاقه . وبلاش اغانى المهرجانات ارجوكم اللى كتير من كلامها غير اخلاقى اصلا والافلام والمسلسلات اللى سيبنهم ادامها ومش عارفين هما بيتعلموا منها ايه

المقال  طول كتير وانا تعبت كمان بكرة ان شاء الله نكمل كلامنا ونشوف ايه اخطاء الابناء وازاى نتعامل معاها وازاى نعاملهم لما يكبروا

استنونى فى تكملة المقال غذا ان شاء الله تعالى