تعليم الذات 4

السلام عليكم وحشتونى كتير اصدقائى واحلى متابعين يلا بينا بسرعة نكمل كلامنا 
عن تعليم الذات وبما ان اللى جالى منكم عن موضوع البنت اللى نهت دراستها فده حايكون موضوعنا اليوم 

تعليم الذات 4

الخريجين 

طيب تعالوا نشوف انا كواحدة او واحد خلصت التعليم الحكومى وعملت اللى عليا . 

عايزة اشتغل بقى بس طيب المفروض ايه المقومات اللى تكون عندى 

بصوا هو عدد من الحاجات كده انتوا طبعا عارفين ان صعب اننا نشتغل بمجالنا انا عن نفسى اشتغلت فى مجالى بعد عدد لا باس بيه من الشغل فى مجالات مالهاش اى دخل لا ببعضها ولا باللى انا درساه اساسا 
                      

يبقى علشان بس مش نحس بالاحباط من اولها اتخرجنا ومش لقيين شغل فى مجالنا اوك . طيب اعمل ايه يعنى اعد فى البيت لا طبعا بس لازم عليكى انك تاخدى كورسات وعلى ما يتم الامر ده شوفى انتى بتحبى ايه او بتعرفى تعملى ايه وحاولى تشتغلى بيه . مش عيب على فكرة يعنى انا اشتغلت فى الكتابة على الكمبيوتر واول شغلى كان فى حضانة وفى شركات تسويق على التليفون وهكذا طيب يبقى حانحاول نعمل حاجة اولا نستقل بيها ماديا وتانى حاجة نستفاد بالوقت فى تطوير نفسنا وعلى فكرة كمان فى مرة اشتغلت فى الكروشيه وكسبت منه يعنى من الاخر مافيش حاجة اتعلمتها الا لما اشتغلت بيها 

نرجع تانى ايه اللى عليا اتعلمه هما جزئين الصراحة 

الاول مهارات خاصة بالعلوم الاكاديمية 

ودى زى الكمبيوتر عيب اوى تبقى معلوماتنا فيه بس مقتصرة على الفيس بوك ووسائل الاتصال الاجتماعى , فين برامج الكتابة والفوتوشوب والجرافيك والصور......... وحسب ما تحب المجال المهم يكون فيه حاجة منهم ودى بعد كده تنفعك فى الشغل 

سواء فى شركات او حتى فى خدمات تقدمها على النت 

واللغة وبلاش اللغة بتاعت الدراسة وحتى اذا كنتى بتعرفى فى لغة معينة بتتكلميها يعنى او اخدتى كورس من وقت راجعيها تانى اسمعى اغانى بيها او اتفرجى على مسلسلات وافلام باللغة دى من غير ما تتفرجى على الترجمة 

الثانى من المهارات هى مهارات عامة 

حاجة كده زى الثقافة العامة هههههه بالظبط لانها مش حاتنفع فى شغلك وبس لا دى فى الحياة عموما 

زى اول حاجة فى وجهة نظرى اعرفى نفسك ؟؟؟؟؟

يعنى ايه اه اعرفى عيوبك ومن غير ما نكذب على نفسنا 

انا بعشق القراية كتير بس فى وقت جه عليا كنت مش ادره اقرى اى حاجة او اسمع حتى ووقتها القلم وقف او بمعنى ادق مالقتش حاجة اكتبها , وكان لازم وقتها اواجه نفسى انى فضيت وفيه مشكلة ولازم احلها 

مواجهة النفس اول طريق اننا نتغير يعنى مثلا اذا انت رافض انك تعترف انك عندك مرض معين حاتتعالج عمرك ..... اكيد لا 

هو كده بالظبط وكمان حاجة زيادة كده اعرفى عقلك بيشتغل ازاى فيه حاجة جوه عقلنا اسمه العقل الباطن وبجد والله اعرفى واقرى عنه حاتستفادى كتير 

طيب ايه هى المهارات دى اولا فن اقناع الناس ومعرفة الشخصيات وازاى تتعاملى مع الناس ومع الانسان اللى يحرجك 

كتيييير حصلت معايا هههههه فيه ناس كده دمها شربات هههه بتحب موت تحرجك وتضايقك فى الوقت ده خليكى بادرة فكرى فى اى حاجة تانية علشان مش تتضايقى اذا بينتى انك مش مضايقة حايتجنن اللى قدامك وقتها انتى اللى حاتحرقى دمه مش العكس

ماتخافيش من كلام الناس , ومش تهتمى اوى بالمظهر وعلشانه تسيبى نفسك او تغيرى عاداتك ومبادئك علشان تعجبى تمام خليكى انتى نفسك  .

زمايل الشغل 

هما صنفين يا كويسيين اوى يا ... اوى ههههههه 

الصنف التانى ده حاولى تصاحبيه مش نفاق لا بس اتعاملى من غير ما تسيبى وراكى اعداء ما تعمليش اعداء 

افتكر مرة كنت فى شغل من الشركات اللى بقولكم عليها وكان فيه بنتين فى الشغل اصحاب من فترة وانا جديدة عليهم و وحصلت مضايقات فى التضييق عليا فى مواعيد الشغل او حتى لما بيجيلى مكالمات فى الشغل 

لحد لما عرضت على البنوته مديرة المكتب انى معايا باقة فى الفون لو عايزة تكلم حد بشرط ان الارقام اللى تكلمها ماترنش عليا تانى . وبس كده بقينا اصحاب من يومها حتى انها بقت تقولى على حاجات تخلينى احسن فى شغلى
يبقى تعرفى ازاى تاثرى وتقنعى الناس وازاى تتعاملى وده بقى بالنسبة لنوعك وللاخر يعنى اذا انتى بنت ازاى تتعاملى مع البنات ومع الرجال وده لان العقل مختلف تماما وطريقة التفكير مختلفة جدا , بالنسبة للنوعين سواء رجل او بنت 
 اسمعى كتير واتكلمى بعد ما تفكرى كويس اوى واذا فيه حاجة مافهمتيهاش اسالى عليها 
على فكرة اهلك مش ضدك او راحت عليهم لا هما عندهم خبرة كبيرة اعرفى ازاى تصاحبيهم حسسيهم انهم مهمين وحتى اذا اللى قالوه انتى حافظاه اسمعيه واشكريهم ماتعرفيش حاتفارقيهم امتى 
يمكن تسافرى او تتجوزى ومش تعرفى تشوفيهم كل يوم او بعد الشر حد حايسيب التانى ويتوفى كلنا مفارقين لازم تعرفى ده 
ماتخافيش تجربى الجديد دى حياتنا كل يوم فى مكان جديد 
اه كمان لما تشتغلى فى حاجة روحى على النت او اسالى حد عنده خبرة واتعلمى كل حاجة فيها وياريت تضيفى من عندك ده حايخليكى تنجحى اسرع وتبقى فى مكانه احسن 
تقريبا ده اللى جمعته على ما اتذكر  عن ايام الشغل وانتهاء دراستى والتخرج واللى فادنى بعدين فى حياتى .
 صحيح بالنسبة لتعلم المهارات مش ضرورى كورسات تدفعى فيها فلوس كتير كورسات من على النت ودى حاتلاقيها كتير بس بليز مش تكتفى بالكورس وخدى عنوان الحاجة اللى بتتعلميها وابحثى عنها اعملى زى دراسة كاملة ده حايخليكى تتميزى اكتر 
حانخلص سلسلة تعليم الذات وان شاء الله نبدا سلسلة جديدة عن الصعوبات اللى بتقابلنا فى كل مرحلة 
يعنى فى الثانوى مع الاصدقاء وانتى مخطوبة مع اولادك او مشاكلك ووالدتك فى الشغل او الدراسة 
ابعتولى ومستنياكم