الصعوبات التى نواجهها بالحياة 3

الصعوبات التى نواحهها فى الحياة 3

  مساء الخير اعضاءنا الكرام  احلى فانزى واجدع اصدقاء  وحشتونى يارب تكون مقالاتى بتعجبكم ويارب تفيدكم اعتذر عن مقال الامس نظرا لمرضى .

يلا بسرعة نشوف حانتكلم عن ايه انهاردة

الثقة بالنفس

بصراحة كنت بقرا كتاب انهاردة وكمان افتكرت مواقف حصلت معايا خلت ثقتى بنفسى صفر وعلشان كده قررت انهاردة يكون ده موضوعنا . يلا بينا

اولا كده

اسباب قلة الثقة بالنفس

فيه حاجات كتير يوووه اخطرها واهمها حاجتين وفاة شخص عزيز او مرض للشخص نفسه او لاقرب الناس ليه  بعدها بقى تيجى اسباب اقل زى مثلا حب فاشل او فشل فى عمل فى دراسة خيانة صداقة وهكذا طيب حاتسبينا كده ولا ايه حكايتك ههههههههه اكيد لا تعالوا نعرف انا من واقع خبرتى من الحياة عملت ايه

حاقولكم على اخطر سببين وعملوا فيا ايه لانى مريت بيهم مع الاسف والحمد والشكر لله الف مرة انى رجعت تانى بعد كل الضربات اللى الحياة ادتهانى

اولا الوفاة 

عدت عليا مع مرور سنين عمرى وفيات لاقارب وناس اعزاء فى حياتى كتير وكان كل منهم بتعلم صح فيا بس اكبر الاثر كانت اخر مرة لانها كانت قريبة اوى وتقريبا كل اليوم مع بعض على التليفون الفيس وهكذا وفجأة وبدون مقدمات تعبت كتير ويادوب اربعين يوم واتوفت الموضوع كان صعب كتير ومش عارفة اعمل ايه طبعا انتى وسط عائلتك ماينفعش طول الوقت تبقى بتعيطى وتعبانه كانت اقرب صديقة ليا الله يرحمها ويغفرلها الموضوع ده فات عليه اربع سنين حاليا لكن لما بتكلم عنها وكاننا كنا مع بعض امبارح . المهم وقتها مش عرفت اشوف اى حاجة زى ما كانت وكنت مش بشتغل وقتها حتى بعد كام شهر جت مناسبة سعيدة فى البيت ومش كنت حاسة باى حاجة حتى عيد ميلادى فى نفس سنة الوفاة قضيته بعيط ومش حبيت احتفل بيه واضايقت من اختى لما نزلت جبتلى التورته . باختصار كانت الدنيا ادامى سودا وكتير كنت بقول امتى حاموت انا كمان زيها

ولكن لرب العالمين حكمة فى كل شئ بدأت اكتب اول قصة ليا نشرتها على النت وفى كتير مواقع وهى (عزيزى الحب ) يمكن البعض يحسوها رومانسية بس انا كنت اقصد منها الصداقة ومعناها كنت بحس لما بكتب عن الصداقة بين البطلة وصديقتها او البطل وصديقه انها معايا جنبى ولما حققت نجاح كبير بالنسبة ليا اول حاجة انشرها وفى شهر او شهر ونص تجيب 18 الف مشاهدة كانت بالنسبة ليا مفاجاة انا بسميه عوض ربنا  ليا وكان رب العالمين كان بيقولى مش دى الحاجة اللى كنتى عايزاها من زمان. يادوب كان قلة من الناس بيقرولى من اصدقائى وبس حتى اهلى ما كنوش يعرفوا انى بجد بكتب قصص وممكن انشرها

وقتها ومع العمل عادت لى ثقتى بنفسى , الانجاز والبحث عن البديل انا بدلت انها تكون معايا فى الحقيقة بانها تكون معايا فى كل قصة اكتب فيها عن الصداقة بانى اعيش شعور الصداقة اللى فقدته معاها فى قصص من كتابتى وكانها معايا ومش معنى كده انى مش عندى اصدقاء تانيين لا الحمد لله عندى اصدقاء كتير وجدعان جدا صحبات صحباتهم بجد وربنا يخليهم ليا . بس فيه اشخاص يجوا حياتنا علشان يعلمونا حاجة ويمشوا تانى

اما فى المرض فعايشته اكتر من حوالى سنة ونص فى مرض والدتى , بردوا جه على فجاة تعب وعملية ومستشفى وحاجات كده كتير وانا قبل كده كانت حياتى فى شغلى وبس ولاول مرة احس ان امى واللى بستمد منها قوتى  بتضيع منى ارتبكت حسيت ان دنيتى بتتهز وان الارض تحت اقدامى مش ثابته خفت كتير بس ماكنش ينفع انهار . المسئولية لما بتكون مع السبب فيه حاجتين وقتها يا تبقى عيل وماتستحملش ووقتها عمرك ما حاتكبر , يا تكبر وانتهى الامر ومعنى انك تكبر حتى لو عندك عشر سنين خلاص . بيحصل جواك ان نظرتك لكل شئ بتتغير وبتكون اعمق وهو ده اللى اقصد من انك تكبر وكان عمر تانى بتجاربه وخبراته زاد على عمرك . وانا اخترت انى اكبر فضلت صامدة واول ما بدات تتحسن ولله الحمد تعبت انا

تعبت كتير واعدت كده اكتر من شهرين احيانا مش كنت بعرف احنا فى يوم ايه . عياط من غير سبب نوم بساعات طويلة . اكل بشراهه او امتنع عن الاكل . وفى النهاية حصلى حاجة فوقتنى لقتنى ممكن انى اتعب اكتر عضويا وسمعت صوت من جوايا بيقولى صحتك اهم كانت دى كلمات صديقتى الله يرحمها . وكانى كنت نايمة وفجاة صحيت . ومن وقتها قولت لا اذا بقيت لوحدى عمر ما حد حايشيل عنى لا الالم ولا التعب واذا لا قدر الله جاى مرض خطير حاترمى فى المستشفى لوحدى . وحاموت لوحدى طيب ما طلاما كده او كده انا لوحدى انا بدور على مين يبقى اكيد حانجح لوحدى .

بدأت افكر فى نجاحى وانا هنا انهاردة بحكيلكم على اللى مريت بيه

اذا حصلك شئ مشابه انكب على العمل اه اشتغل وكتير اوى ذاكر المهم مايبقاش فيه وقت علشان تفكر . فكر فى كل اللحظات اللى نجحت فيها واعرف انك تقدر تحققها تانى . شوف مين محتاجلك فى ايه واعملهوله وقتها حاتقوى نفسك بانك مهم . شوف انت ممكن تساعد الناس ازاى وساعدهم . من مساعدتك لغيرك او تعليمهم شئ وقتها بس حاتعرف قيمتك وترجعلك ثقتك بنفسك

استنونى فى مقال جديد