سلسلة تعليم الذات 3

                                سلسلة تعليم الذات 3

مساء الخير على احلى اعضاء ومتابعين اصدقائى واصدقاء المدونة والبيدج وحشتونى كتير تعالوا نكمل كلامنا عن التعليم والتعلم

اتكلمنا من قبل عن ان معظمنا مش بيحقق احلامه او اللى عايز يعمله ويتعلمه وبيرتضى بالوضع اللى عايش فيه حتى لو مش راضى عنه ولكنه بيرضخ ليه فى النهاية . وقولنا ان فيه معوقات كتير او اسباب بنعتبرها السبب فى كتير من الاحيان وفى احيان اخرى بناخد منها حجة على عدم اكمالنا الامر , ودى اتكلمنا عليها فى مقال الامس

            

تعالوا انهاردة نكمل كلامنا .

اولا تعليم الذات اللى انا اخداه عنوان لموضوع السلسة مش معناه ابدا ولا اقصد بيه التعليم الحكومى او الاكاديمى بس لا

 لان ده بيجى وقت وينتهى يعنى بنخلص مدرسة نتخرج من الجامعة , نناقش الماجستير او الدكتوراه بس انا اقصد حالة التعلم نفسها .

وعلى فكرة حتى لو انتى امراة متزوجة وعندك عيال واعده فى بيتك . لازم تتعلمى حاتقوليلى اتعلم ايه وليه حانعمله موضوع خاص ومقال خاص ممكن بكره ان شاء الله نتكلم عنه ابعتولى

علشان اعرف اتكلم بكره ان شاء الله عن الست المتزوجة وربة المنزل او البنت اللى نهت دراستها ولسه فى بيتها مقبلة على الزواج , او اللى بتشتغل , او بتدور على شغل

انهاردة حانتكلم عن دارسى الجامعة او اللى لسه حايدخلوا الجامعة

طيب , يبقى كده حانجزا مقالتنا علشان مش يكون المقال طويل وطبعا زى ما اتعودنا انا بحكى عن تجربتى الشخصية او تجربة حد عايشتها معاه

الطلاب

طيب انا وقت ما كنت طالبة فى الجامعة زى ما حكتلكم اخدت كورس انجليزى صحيح الوقت اتعارض مع محاضراتى ومواعيد الكورس وخصوصا انى بدات الكورس وكنت داخل على امتحانات وعلشان كده اجلت الكورس للتخرج وده كان ضدى بصراحة بس كمان وقتنا ما كنش فيه النت بكل الامكانيات دى ما كنتش التكنولوجيا بالشكل ده يعنى كانت اقل كتير الكلام ده  2005 المهم

انا كمنار ماكنتش بس بذاكر اللى عليا بصراحة لا كنت بنزل المكتبة وبقرأ عن حاجات مختلفة يعنى كنت اشوف فى اخر الكتاب فهرس المراجع والمصادر وانزل المكتبة او مكتبة الاسكندرية واقرا عن الحاجات اللى بدرسها وعن حاجات تانية انا عن نفسى من ثانوى وبحب اقرأ فى علم النفس والاجتماع . عن البحار والجولوجيا كثقافة عامة يعنى .

بالمناسبة افتكرت وانا فى ثانوى مرة فى البريك بتاعنا الفسحة يعنى صديقاتى اعدوا يدورا عليا كتير لما الوقت كان حاينتهى ومش عارفين انا فين وفى الاخر لقونى فى المكتبة . اليوم ده طبعا اخدت تهزيق منهم هههههههه خلصت الفسحة وهما بيدورا عليا ماعلينا  

هى القراءة بالنسبة ليا حياة تانية . عارفة لما تبقى تعبانة او مضايقة من حاجة وتقرى عن اى حاجة بقى رواية عن مملكة الاسماك الحيوانات فى التاريخ او تاريخ الشعوب

بتلاقى نفسك انتقلتى فى مكان تانى خالص وكانك سفرتى عبر الزمن

نكمل كلامنا اللى اقصد فى الموضوع اتعلم لو انت فى دراسة معينة ماتكتفيش باللى بتاخده فى الكتب لا اقرا بره عنه وعن حاجات تانية متداخلة معاه او حتى بعيدة عنه

اتعلم كمبيوتر وبرامج زى الورد والبوربوينت الانترنت ومش معناه انى ازاى افتح حساب فيس او تويتر وانى اعد على فيديوهات اليوتيوب نو . شوف البرامج الجديدة اتعلم من اليوتيوب اوك بس مش تضيع وقتك على الفاضى لانه هو ده ثروتك دلوئتى

لو بتحب التصوير والسلفى ابحث عن برامج ليها نزلها واعد عليها لحد لما تعرف كل حاجة عنها

عن نفسى الحمد لله كل حاجة اتعلمتها نفعتنى يا فى وقتها او بعدها يعنى مثلا علم النفس نفعنى فى ازاى اتعامل مع الناس والاطفال الكمبيوتر نفعنى فى شغل اشتغلته من قبل وكمان لما جيت اكتب على النت وقيس على ده فى كل حياتك . وخليك دايما فاكر انهاردة عندك وقت بكرة مش حاتلاقيه وزى ما قريت جملة مش فاكرة فين بصراحة بس اخدتها منهج لحياتى

( تعلم فى السلم لوقت الحرب )

لان كل حاجة حاتتعلمها حاتنفعك فى وقتها وبعدين

ابعتولى علشان اعرف بكرة نتختار ايه نتكلم عنه