الصعوبات التى نواجها فى الحياة 1

الصعوبات التى تواجهنا

                 

اصدقائى واصدقاء المدونة
امبارح نهينا اخر مقال فى سلسلة تعليم الذات بس وصلنى سؤال وكان يجب فيه الرد لذلك اوحى لى السؤال بكتابة تلك السلسة الجديدة وهى عن الصعوبات التى تواجهنا فى الحياة
حانتكلم عن الطلاب والمراة المتزوجة المراهقات ومشكلاتهم والبنت المخطوبة وحاجات تانية كتير
السؤال اللى اتسالته كان
بنت فى سن المراهقة وهى عزيزة على قلبى بالمناسبة سالتنى
 كيف اتغلب على الخوف؟ هى فى مرحلة دراسية وبتنتقل لمرحلة تانية
بصراحة وقتها رديت فى الرسالة عليها بكلمات مقتضبة ووعدتها حاعمل مقال شامل عن الموضوع وهاه انا انفذ وعدى
موضوعنا انهاردة

كيف اتغلب على الخوف ؟

الخوف من الانتقال لمرحلة جديدة او شغل جديد بيت جديد ومكان اقامة جديد اى حاجة بتنقل فيها من مرحلة لاخرى وده اساس الحياة يعنى مافيش حاجة بتفضل على حالها ودى حقيقة
طيب انا كمنار حاقولكم ازاى بتعامل مع الموضوع
الحقيقة انى باخد الموضوع من شقين شق دينى وشق مهارات بعلمها لنفسى او تحدث مع الذات سموها زى ما انتوا عايزين



اولا الشق الدينى : ومعلش ده حاتكلم فيه باستفاضة شوية واستحملونى مع الاسف الايام دى احنا مش بنهتم بالتعليم الدينى زى زمان وابدا مش معى ده انى البس اى حاجة او لبس واسع اوى ومش لايق عليا او اى حاجة ومعاملتى تكون سيئة مع الناس او انى اتعلم قرءان وسنة وحديث وانسى العلوم الاكاديمية لا سورى ده مفهوم خاطئ عن الدين واللى يقولك سيبك الدين مقتصر على الصلاة والصوم بس نو لا والف لا فى عصر التكنولوجيا والسرعة والمادة اللى احنا فيه نسينا ان ربنا اللى خلقنا طيب انا عايزة اعمل اى حاجة اشتغل ادرس عندى حلم نفسى اوصله اتجوز عايز فلوس ايان كان الامر قبل ما تقولى ايه غرضك او ليه عايز الشئ ده وده اهم شئ قبله ربنا سبحانه
طيب انتى تقصدى ايه زهقتينينا بصوا انا اقصد اننا نرجع الامر لربنا فى كل شئ ولله المثل الاعلى اذا عندك واحدة صاحبتك وبتحبك جدا ومش بتخبى عليها حاجة ولا هى بتستحمل عليكى اى حاجة انك تمرضى او تضيع وقتك واى حاجة مفيدة بتقولك عليها علشان تكونى احسن صاحبة صاحبتها يعنى وعمرها ما بتسيبك ابدا دى تثقى فيها اد ايه يعنى ممكن تفكرى انها حاتضرك فى يوم او حاتطلبى منها طلب ومش حاتنفذه اكيد لا مش كده طيب حاتعملى ليها انتى ايه اكيد كل طلباتها عندك مجابة وابدا مش حاتعملى حاجة تضايقها او تزعلها واول ما تنادى عليكى تجرى وتسيبى كل حاجة وتردى عليها صح طيب ولله المثل الاعلى ربنا هو اللى خالقك ومش بس كده كل الكون بمخلوقاته بقوانينه خلقه واذا اراد حايخلى الكون كله يعملك اللى انتى عايزاه يكفى انك تثقى فيه اذا كنتى بتثقى بصاحبتك ووالدتك ووالدك واخواتك انهم مش حايضروكى فمابالك برب الكون كله .
طيب انتى عارفة ربنا خالقك ايه ملكين على كتافك واحد للحسنات حتى لو مش عملتيها بمجرد التفكير فى حاجة كويسة تتكتبلك حسنة وليها 10 اضعاف والتانى للسيئات اذا فكرتى فى عمل سئ او ذنب ومش عملتيه مش حايتكتب لا كمان اذا عملتيه واستغفرتى او عملتى بعده حاجة كويسة تتبدل لحسنة , سيئة واحدة  اللى بتتكتب  لا وكمان فى حديث ان كتابة الذنب بتعد 6 ساعات اذا مش استغفرتى تتكتب استغفرلاتى مش حايتكتب بس وكتير الاعمال اللى ممكن تعمليها ومش محتاجة وقت ولا مجهود وقبلها جواكى ايه طيب يارب خلقتلى ايه تانى انتى بتقولى لوحدك وده ردا على السؤال
انتى فى الحقيقة مش لوحدك ربنا معاكى اقرب ليكى من حبل الوريد اللى هو وريد موجود فى الرقبة  اذا انقطع مات الانسان وكمان فيه ملكين معاكى على كتافك وملائكة معقبات ومعناها يتعقبون الانسان ليحفظونه من المصائب والحوادث الا ما كتبت له ان تصيبه يعنى بالعام كده ولله المثل الاعلى ربنا بعتلك حراس بودى جارد يا ستى من الملائكة فى النهار وفى الليل بيحفظوكى يعنى اللى تقولى اخاف  امشى لوحدى لحسن حد يعاكسنى او يضايقنى ويتطاول لا الملائكة حافظينك الا القدر المقدر ليكى
ده الشق الدينى وما ينفعش بصراحة اخرج الدين من الدنيا لاننا اتخلقنا علشان نعبد ربنا فى الاساس ونعمر الارض اى حاجة لصالح نفسك والبشر تكون عمارة للارض
يبقى اللى يقولى هدفى وحلمى وكل ده من غير الثقة فى ربنا وانك تكون حاطط ربنا ادامك لا حاتوصل لنقطة معينة وتقف وحتى اللى وصلت مش حايكون زى اللى ربنا معاه تخيل رب الكون معاك وقتها لا فقر او مرض او اى شئ يهمك بمجرد ما ترفع ايدك للسما حايحققلك اللى عايزه مادام فى خير ليك وعلشان كده ربنا امرنا ندعوه باسمائه وفى مقال تانى حاكتبه عن اسماء الله الحسنى والاحداث اللى حصلت ليا لما بدأت استخدمها فى حياتى .

الشق التانى بقى

انا اتوكلت على الله وعارف انه معايا بس بردوا لسه شوية يعنى اعمل ايه بصى انا من الناس اللى كنت بخاف اوى انى ادخل مكان اول مرة لوحدى وعلشان كده فى الكلية كنت انا فى المجمع معظم صحباتى كانوا فى كلية  تانية واللى كانوا معايا فى نفس الكلية كانوا اقسام تانية بعيدة عنى فى مبنى منفصل تماما وبعيد عن المبنى بتاعى والقسم بتاعى ماكنش فيه حد اعرفه  .
اولا علشان اعرف اتاقلم مع الكلية بقيت اروح كتير مع حد قبل الدراسة بظبط ورق بسال على حاجة المهم اروح واطلع القسم بتاعى مع حد احاول اتعرف على اكبر قدر من المكان مع شخص مش لوحدى تمام وقتها لما كنت بروح انا عارفة المكان فخلاص اول جزء من الخوف انتهى وعملت الفة مع المكان .
بالنسبة للناس كنت انا فى وقت بروح واتعرف على بنت مثلا بحسها شكلى هادية واعده لوحدها مش كنت بحب اتعرف على شلة كاملة لا ابدا بواحدة بس وممكن هى تعرفنى على شلتها وهكذا او احنا الاتنين نكون شلة وعلى فكرة الاحساس ده مش عندك انتى بس فحاتلاقى بنات كتير زيك مستنيين يتعرفوا على حد زيهم
طيب اتعرفت على بنت وطلعت مش زى فى الطبع فى الثقافة وحتى فى الاخلاق مش شبهى يعنى وما تفاهمناش  وقتها اعمل ايه اسيبها بسرعة كانها مرض معدى وامشى لا يا فالحة ماينفعش وقتها حاتحطك فى دماغها وتبقى بتعملى اعداء طيب افضل معاها يعنى لا بردوا لان الرسول صلى الله عليه وسلم قال ( المرء على دين خليله فلينظر احدكم من يخالل) معنى الكلام ان انتى زى صاحبتك اذا كويسة حاتبقى كويسة واذا هى وحشة حاتخليكى وحشة طيب جننتينى يا منار اعمل ايه
سبيها بالتدريج قللى اعداتك معاها ولما تكلمك اتحججى اصلى تعابه عندى حد تعبان عندى مذاكرة ماشفتكيش نسيت ومن وقت للتانى ماتنسيش السلام يعنى لما تشوفيها سلمى عليها وعامليها بادب واخلاق حتى اذا كانت هى عكس كده يمكن اخلاقك تحسن طبعا وفى مقال تانى عن التنمر عديت بيه فى الاعدادى او الثانوى والله ما فاكرة حاحكيلكم عنه ونخليه فى مقال لوحده .

الخلاصة
يبقى الاهم دلوئتى افتكرى انك مش لوحدك وربنا معاكى وفيه ملايكة محوطاكى ومعاكى اوك روحى المكان اللى اتنقلتى فيه اكتر من مرة مع حد واتجولى فيه بحيث تعملى معاه األفة وصداقة اه فيه صداقة مع الاماكن وذكريات تفتكريها لما تكونى لوحدك يعنى اذا كانت مدرسة او مكان لسكن اه ده انا جيت مع صاحبتى سالنا على كده من قبل حتى اذا انتى لوحدك الذكرى حاترسلك مشاعر مطمئنه وكمان حاولى تتعرفى على بنوته شبهك او حد شبهك ومش تخافى انها تكسفك اذا حصل وده قليل اوى او نادر يعنى استاذنى بلطف وادب وقوليلها معلش عندى حاجة اعملها واتشرفت بمعرفتك وامشى بس ان شاء الله مش حايحصل مش عندنا فى مصر ولا حتى فى وطنا العربى ومش من طبيعة الانسان عموما واذا حتى وقعتى فى صاحبة مش اد كده اتعاملى بلطف وقللى وجودك معاها وحتى مكن تشغلى نفسك بحاجة مفيدة وانتى جنبها يعنى تقرىء كتاب او تتابعى مقال تسالى عن حاجة مفيدة وهكذا وهى حاتحس من نفسها انك بتبعدى بس حافظى على الادب والمودة فى المعاملة لعل الله يهديها ماتعرفيش جايز تكون كويسة من جواها وتكونى سبب فى اصلاحها


حاتوحشونى كتير استنونى بكرة ومقال جديد ان شاء الله

ابعتولى عايزين نتكلم فى ايه تانى