ما علمتنى الحياة ٢

ما علمتنى الحياة  فى تحقيق ما اريد

امبارح اتكلمنا ان ازاى نقنع اللى حوالينا والناس بالحاجة اللى انت  عايزها.
واليوم حانكمل كلامنا ونبدأ بازاى احقق الحلم ده
ناس كتير وانا كنت منهم على فكرة فى بداية حياتى انا بحب اكتب شعر وقصص وروايات مقالات بس لنفسى ممكن فى يوم انى كون كاتبة، ده كان كلامى لنفسى وقتها  
ما كنتش عارفة ابدا منين شايفة الحلم على بعضه كبير ومش عارفة ابدا طريقى منين . ما اقدرش احدد يوم او تاريخ معين اقول الوقت اللى منار فيه اصبحت سبيل او امتى الناس حبت كتاباتى وبقت تسألنى  عن الجديد ليا .مش عارفة بس كل اللى اعرفة انى اتمسكت بشدة بالكتابة .كنت بكتب فى كل وقت واى مكان
فى مدرج الكلية وانا اعدة على البحر مع عيلتى او فى مشوار ليا مع صديقتى .حتى كان ممكن تيجى فكرة او شعر اقوم من النوم اكتبها .اتمسكت بالكتابة كتير .مع العلم ان  بعد التخرج  اشتغلت فى مجالات مختلفة بس كل مرة كنت بحس انى بتخنق لان ده مش مكانى حاجة من جوايا بتقولى دى مش انتى وده مش دورك .عارف لما بتتمسك بحلمك اوى بيتحقق ازاى ماتعرفش ربنا بيسخرلك حاجات كده فى طريقك توصلك ومن غير ما تحس تلاقى نفسك بقيت على اول السلم وتقدر تشوف درجاته .على الرغم انك من قبل ما كنتش عارف فين الطريق اصلا صح فيه كمان اوقات بتمر عليك ظروف تقول انها بتعطلك او حتى بتنهيك بس الغريب ان نفس الظروف دى بتكون بداية خطوة جديدة فى الطريق واحيانا كمان ربنا بيدخلك فى طريق تانى علشان يصححلك طريق حلمك .بس كن على ثقة مدام  ربك اداك الموهبة فى الحلم اللى انت عايز تحققه يبقى اكيد تقدر توصل للطريق .لان كل شئ ربنا سبحانه خلقه فينا لحكمة وغاية . فاذا انت حاليا زى ما انا كنت فى يوم مش عارفة ابدأ منين ماتخفش يكفى بس انك تتعلم ايوه اتعلم واقرأ عن موهبتك دى او الحلم اللى نفسك  توصله ،لان وقت ما تبدأ طريقك الوقت حايكون قليل اوى وممكن ماتلاقيش وقت علشان تتعلم كل اللى المفروض تعرفه وزى ما سمعت مقولة مش فاكرة فين بس بقت جملتى المشهورة
( تعلم فى وقت السلم  ، لوقت الحرب )
جهز نفسك وساعدها وخلى الدافع ليك من جواك . ارسم صورة لنفسك وانت وصلت للى بتحلم بيه ووقت ما تكون الظروف صعبة عليك افتكر الصورة دى وعيش بيها عيش فيها وكانها حقيقة حاتديك القوة علشان تكمل والاهم ماتستسلمش